Иртнĕ шăмат кун, карлач уйăхĕн 27- мĕшĕнче, Оборонăпа массăллă тата спорт ĕçĕн уйăхлăхĕ йĕркипе Туçи Çармăс ялĕнче, çак шкулта физкультура учителĕ пулса ĕçленĕ,  Сергей Иванович Александрова халалласа черетлĕ волейбол турнирĕ иртрĕ. Ку ĕнтĕ черетпе улттăмĕш.

Волейбол площадкинче С.И. Александров кубокне çĕнсе илессишĕн пурĕ пилĕк команда тупăшрĕç: Туçи Çармăс, Кивĕ Сăрьел, Мăн Явăш, Янгорчино, Вăрман Кипек ял тăрăхĕнчи çамрăксем.

Спорт уявне Кĕçĕн Кипек ял тăрăхĕн пуçлăхĕ С. К.Волков уçрĕ. Вăйă йĕркине вара тĕп судья С.И. Марков паллаштарчĕ.

Ун хыççăн ăмăрту пуçланчĕ. Спортзала пухăннă халах чăн-чăн волейбол вăййине курса чун-чĕререн савăнчĕ.

Çивĕч те хĕрÿ ăмăртура пăхăр медале Мăн Явăшсем çĕнсе илчĕç. Иккĕмĕш вырăна Кивĕ Сăрьел команди тухрĕ. Туçи Çармăс команди çĕнтерÿçĕ пулса тăчĕ. Çĕнтерÿçĕ командăна тата призерсене хисеп хучĕсемпе, медальсемпе чысларĕç.

Турнира тивĕçлĕ шайра ирттерме С. И. Александровăн мăшăрĕ Ирина Ивановнăпа Саша ывăлĕ пулăшрĕç. Çавăн пекех Кĕçĕн Кипек  шкул директорĕ Сепанова А. М.,  Кĕçĕн Кипек ял тăрăхĕн администрацийĕ хавхалантрачĕç.Турнира йĕркелесе ирттерессине пысăк тÿпе хываканĕ Кĕçĕн Кипек шкулĕнче ĕçлекен физкультура учителĕ Марков С.И. пулчĕ.