Ака уйӑхĕн 20-мĕшĕнче пирĕн шкулта чӑваш чĕлхи эрни пуçланчĕ. Çак кун пирĕн пата районти шкулсенче чӑваш чĕлхипе литературине вĕрентекенсем килсе çитрĕç.

 6-мĕш класра Иванова Н.П. ертсе пынипе  Ева Лисина çырнӑ «Çӑкӑр чĕлли» калав тӑрӑх  уçӑ урок иртрĕ.

        Ева Лисина – чӑвашсен паллӑ çыравçи, Геннадий Айхи сӑвӑçӑн тӑванĕ. «Çӑкӑр чĕлли» калавĕ – чи паллӑ хайлавĕсенчен пĕри. Вӑл çамрӑк ӑрӑва çӑкӑра перекетлеме вĕрентет.

         Урок «Асран кайми аки-сухи» юрӑпа пуçланчĕ. Çак  юрӑ вӑл хӑех ачасене тарӑн шухӑша ярать, урокра мĕн çинчен калаçассине те уçса парать.

       Урокра ачасем тĕрлĕ ĕç туса ирттерчĕç: калав содержанине те аса илчĕç, ваттисен сӑмахĕсемпе те ĕçлерĕç. Унсӑр пуçне тата вĕренекенсем Ева Лисина çыравçӑн чĕрĕ сассине те илтрĕç.

    7-мĕш класра вĕренекенсем Иван Яковлевич Яковлев çырнӑ «Йӑлӑнтарни» тата «Кулачӑ» калавĕсем тӑрӑх сценкӑсем кӑтартрĕç.

     1-мĕш класра вĕренекенсен «Пукане» ташши вара  пурне те килĕшрĕ.

  4-мĕш класра вĕренекен Сергеева Снежана  хӑнасене  сӑвва чӑн-чӑн артист пек калама пултарнипе тĕлĕнтерчĕ. 

    11-мĕш класра вĕренекенсен хӑйсем çырнӑ сӑввисем те  куракансене килĕшрĕç.

Килнĕ хӑнасем урок çÿллĕ шайра иртнине палӑртрĕç. Малашне ĕçлеме ӑнӑçусем сунчĕç.